Ibishanga bitanu bya Kigali bigiye gufungurirwa abaturage: Umushinga wa REMA ugeze ku kigero kirenga 90%

Ibikorwa byo gusana no kugarura ibishanga bitanu byo mu Mujyi wa Kigali bigeze ku kigero kirenga 90%, aho biteganyijwe ko bizarangira muri Kanama 2026. Umushinga wa REMA uzatuma ibi bishanga bihinduka ahantu nyaburanga, bugabanye imyuzure, bunabungabunge urusobe rw’ibinyabuzima, mu gihe abaturage bazahungukira ahantu ho kuruhukira, gukorera siporo no guteza imbere ubukerarugendo bushingiye ku bidukikije.

Nyuma y’intsinzi yagezweho mu gutunganya Pariki y’Ibidukikije ya Nyandungu, Ikigo cy’Igihugu gishinzwe Kubungabunga Ibidukikije (REMA) kiri ku musozo w’umushinga mugari wo gusana no kugarura ibindi bishanga bitanu byo mu Mujyi wa Kigali.

Umujyi wa Kigali watangaje ko ibikorwa byo gutunganya ibi bishanga—Gikondo, Nyabugogo, Kibumba (ahahoze Utexrwa), Rwampara na Rugenge-Rwintare—bigeze ku kigero kirenga 90%, bikaba biteganyijwe kurangira muri Kanama 2026.

Uyu mushinga ufite ubuso bwa hegitari 491, ugamije gusubiza ubuzima ku bishanga byari byarangiritse no kubihindura ahantu nyaburanga hafasha abaturage n’urusobe rw’ibinyabuzima.

Mu bishanga biri gutunganywa, Igishanga cya Gikondo gifite hegitari 162 kizibanda ku bukerarugendo bushingiye ku bidukikije, Nyabugogo gifite hegitari 131 kikazaba ikigo cy’ubushakashatsi n’inyigisho ku rusobe rw’ibinyabuzima, mu gihe Kibumba gifite hegitari 68 kizifashishwa ibikorwa by’uburobyi. Rwampara na Rugenge-Rwintare, buri kimwe gifite hegitari 65, na byo biri kuvugururwa hagamijwe kubungabunga ibidukikije no kongera ubushobozi bwo guhangana n’imihindagurikire y’ibihe.

Ibikorwa byamaze gukorwa birimo kubaka ibiyaga bihangano bifasha gufata amazi no kugabanya imyuzure, gukora inzira z’abanyamaguru n’iz’abatwara amagare, gutera ibiti gakondo, gusubizaho ibimera by’umwimerere ndetse no gutunganya ahantu hazajya hasurwa n’abakerarugendo.

Uretse kongera ubwiza bw’Umujyi wa Kigali, uyu mushinga uzafasha kongera ubwinshi bw’inyoni n’andi moko y’ibinyabuzima, ndetse unateze imbere ubukerarugendo bushingiye ku bidukikije, kimwe n’imibereho myiza y’abaturage.

Umuyobozi Mukuru Wungirije wa REMA, Munyazikwiye Faustin, yavuze ko uyu mushinga uzagira uruhare rukomeye mu gukemura kimwe mu bibazo bikunze kwibasira Umujyi wa Kigali.

Yagize ati: “Twizera neza ko gutunganya bino bishanga bizafasha mu kugabanya ubukana bw’iyo myuzure. Muri rusange ariko bizanafasha gushyira mu bikorwa igenamigambi ku ngamba z’imihindagurikire y’ibihe u Rwanda rwiyemeje mu rwego rwo kugabanya ingaruka z’imihindagurikire y’ibihe ku bukungu bwacu.”

Umwe mu batuye umujyi wa Kigali wahoze mu miturire y’akajagari, yavuze ko ibishanga biri gutunganywa babyitezeho umusaruro ufatika kuko ari mu baciye mu ngaruka z’amazi y’imvura ava ku misozi.

Ati “Mbere twari dutuye nabi wasangaga inzu igiye iri iruhande rw’indi nta hantu na hamwe amazi aca. Byateraga ibyago byinshi kuko amazi yamanukaga mu misozi abantu batuye hasi bakagira ibibazo. Kuba ibi bishanga biri gutunganywa bizajya bituma ayo mazi amanuka afite inzira ku buryo ahegera akabyazwa umusaruro.”

REMA ivuga ko uyu mushinga uri mu ishoramari rinini igihugu kiri gukora mu kubungabunga ibidukikije, aho uteganyijwe gutwara asaga miliyari 80 z’amafaranga y’u Rwanda, ukaba uzafasha kubaka Umujyi wa Kigali urushaho guhangana n’ingaruka z’imihindagurikire y’ibihe no guteza imbere iterambere rirambye.

Mu gihe hasigaye iminsi mike ngo ibikorwa birangire, ibishanga bya Gikondo, Nyabugogo, Kibumba, Rwampara na Rugenge-Rwintare bitegerejweho kuba kimwe mu bikorwa remezo by’ingenzi by’icyatsi (green infrastructure) bizafasha Umujyi wa Kigali kugabanya imyuzure, kubungabunga urusobe rw’ibinyabuzima no guteza imbere ubukerarugendo bushingiye ku bidukikije, bikurikira urugero rwiza rwatanzwe na Pariki ya Nyandungu.

Amafoto: