Amb. Mukantabana yashyizwe mu bagore 25 b’icyitegererezo ku isi mu 2026

Ambasaderi w’u Rwanda muri Leta Zunze Ubumwe za Amerika, Mathilde Mukantabana yashyizwe mu bagore 25 bagaragaje ubudashyikirwa mu mirimo yabo ku rwego mpuzamahanga mu 2026, mu rutonde rwakozwe na Silke Endress International.

Iri shimwe rishingiye ku ruhare rwe mu miyoborere ya dipolomasi, ubunyamwuga n’uruhare yagize mu bikorwa bifite akamaro ku rwego mpuzamahanga. Ni igihembo kigaragaza ko ibikorwa bye n’ubushobozi bwe mu rwego rwa dipolomasi byashimwe.

Silke Endress International ni urubuga mpuzamahanga rw’itangazamakuru rugamije kumenyekanisha abagore bafite uruhare rukomeye mu nzego zitandukanye, barimo abari mu miyoborere, dipolomasi, ubucuruzi n’izindi nzego zifasha mu iterambere ry’isi.

Urwo rubuga rushyira imbere imiyoborere, ubufatanye, guhanga udushya no guha abagore ijambo, binyuze mu nkuru, ibiganiro n’ibikorwa bigamije kubahuza n’amahirwe mashya. Ruyoborwa na CeCe Cole.

Mu bikorwa byarwo harimo urutonde rwa “25 Influential Women”, rugamije gushimira abagore bagaragaje ubuyobozi, ubudashyikirwa n’uruhare mu mpinduka nziza muri sosiyete. Ni muri urwo rwego Ambasaderi Mukantabana yatangajwe nk’umwe mu bagore 25 bashimiwe mu 2026.