DRC: Inyeshyamba za M23 zageze kuri 80km uvuye i Uvira

Kuva mu gitondo cyo kuri uyu wa gatanu mu gace ka Lugezi/Rugezi muri Gurupoma ya Basimukuma-Sud teritwari ya Fizi mu ntara ya Kivu y’Epfo haravugwa imirwano ikomeye hagati ya Wazalendo n’abarwanyi ba Twirwaneho yatumye abasivile batari bacye bava mu byabo bagahunga.

Iyi mirwano yatangiye kuva ahagana saa kumi n’imwe z’igitondo, nk’uko BBC dukesha iyi nkuru nayo ibikesha kuri umwe mu baturage uri mu gace ka Fizi utifuje gutangazwa umwirondoro.

Biravugwa ko hari abaguye muri iyi mirwano ariko biragoye kumenya imibare yabo cyangwa imibare y’abasivile bavuye mu byabo.

Abarwanyi ba Twirwaneho bakorana n’umutwe wa M23, mu gihe Wazalendo ubusanzwe bafatanya n’igisirikare cya leta, FARDC.

Iyi mirwano iravugwa mu gihe abarwanyi ba M23 bivugwa ko ku wa kane bafashe agace ka Katogota kari ku ntera ya kilometero 80 mu majyaruguru uvuye mu mujyi wa Uvira.

Elias Muhasha umwe mu baturage bari i Uvira yabwiye BBC ko abarwanyi ba M23 bafashe Katogota nyuma y’imirwano ikomeye yatangiye ku wa gatatu.

Uruhande rwa M23 ntirwemeje cyangwa ngo ruhakane ko bageze i Katogota, gusa amwe mu mashusho yashyizwe ku mbuga nkoranyambaga ku wa kane yerekana bamwe mu barwanyi ba M23 berekana ko bari i Katogota.

Imirwano irimo kuvugwa mu ntara ya Kivu y’Epfo muri iki cyumweru, ndetse no mu bice bimwe bya Kivu ya Ruguru mu mpera z’icyumweru gishize, mu gihe hari umuhate ugamije kugera ku mahoro hagati ya M23 na leta ya Kinshasa mu biganiro i Doha, ndetse n’umuhate wo kugera ku masezerano y’amahoro hagati ya leta ya Kinshasa n’iya Kigali i Washington.

Abanyamakuru bo muri aka gace baremeza ko mu mirwano ya Lugezi/Rugezi kuri uyu wa gatanu Wazalendo bo mu mutwe wa Biloze Bishambuke ari bo barimo kurwana n’abarwanyi ba Twirwaneho.

Mu gihe Lugezi muri Fizi mu majyepfo ya Uvira havugwa imirwano, Muhasha avuga ko “Uvira hari umutuzo”. Ariko no mu majyaruguru y’uyu mujyi M23 yarenze Kamanyola.

Umuhate wo guhagarika imirwano no kugera ku mahoro washyizwemo imbaraga na Qatar na Leta Zunze Ubumwe za Amerika washimwe n’impande zishyamiranye kandi watanze umusaruro ugaragara kuva mu kwezi gushize ubwo imirwano yeruye kandi ikomeye yacogoye.

Gusa imirwano ya hato na hato yagiye ibaho muri izi ntara zombi za Kivu kugeza ubu.