‎‎Muri iyi mikino yo ku munsi wa 6 Al Ahli Tripoli BBC yo muri Libya yatsinze Made By Basketball yo muri Afurika y’Epfo amanota 102 kuri 73 ihita isoza iyi mikino idatsinzwe.

‎‎Undi mukino wakinwe aho ari nawo wari utegerejwe n’abenshi ni uwa APR BBC yo mu Rwanda na Nairobi City Thunder yo muri Kenya.

‎‎Uyu mukino watangiye ikipe ya APR BBC iri imbere ku manota yari akozwe na Aliou Diarra ariko Nairobi City Thunder nayo ntabwo yigeze itinzamo.

‎Umukino wakomeje Nairobi City Thunder ariyo iri imbere ibifashijwemo n’abarimo Albert Einstein Onyango Odero.

Mu minota 2 ya nyuma APR BBC yagerageje kujya imbere ariko birangira Nairobi City Thunder ariyo isoje iri imbere ku manota abiri yari akozwe na Uchenna Iroegbu ubundi igira 19 kuri 17.

‎Mu gace ka kabiri Nairobi City Thunder yaje ikomerezaho ibifashijwemo n’abarimo Albert Einstein Onyango Odero ubundi isoza igice cya mbere iyoboye n’amanota 45 kuri 35.

‎‎Mu gace ka gatatu ikipe y’Ingabo z’igihugu yaje igerageza gukuramo ikinyuranyo cy’amanota binyuze ku barimo Aliou Diarra ndetse bigera aho hasigaramo ikinyuranyo cy’amanota atatu.

‎Nairobi City Thunder yaje kongera gushyiramo ikinyuranyo cy’amanota menshi ibifashijwemo n’abarimo Albert Einstein Onyango Odero ubundi aka gace karangira iyoboye n’amanota 61 kuri 55.

‎Mu gace ka 4 Nairobi City Thunder yaje ikomeza kuba hejuru gusa mu minota ya nyuma APR BBC iza kuyifata ndetse habura amasegonda 3 Obadiah Noel akora amanota 3 ubundi iyi kipe y’Ingabo z’igihugu ihita isoza umukino iyoboye n’amanota 77 kuri 74.

‎Ikipe ya APR BBC yahise ibona itike y’imikino ya nyuma ya BAL 2025 izabera muri Afurika y’Epfo aho yazamutse iri ku mwanya wa kabiri inyuma ya Al Ahli Tripoli BBC.

‎‎Uyu mukino warebwe n’abanyacyubahiro batandukanye barimo na Perezida Kagame wakurikiye iyi mikino kuva ku munsi wa mbere.

‎

‎

APR BBC yakatishije itike y’imikino ya nyuma ya BAL 2025