#Kwitaizina2025: Minisitiri w’Intebe yasabye abaturiye Pariki kubyaza umusaruro ibikorwaremezo byabashyiriweho
Ni ubutumwa yatanze kuri uyu wa Gatanu tariki ya 5 Nzeri 2025, mu Kinigi, mu karere ka Musanze,mu birori byo kwita Izina abana b’ingagi 40.
Ni ibirori byitabiriwe n’abagera ku 10.000, barimo abatuye aka karere n’abandi baturutse hirya no hino ku Isi ,baje muri uyu muhango.
Minisitiri w’Intebe, Dr Nsengiyumva Justin yavuze ko muco Nyarwanda, kwita umwana izina atari ari ibisanzwe ahubwo ari igikorwa cy’urukundo, igikorwa cyigaragaza ishyaka, n’ikizere mu maso y’inshuti n’imiryango bagira uruhare mu gushyigikira ahazaza h’uwo mwana.
Minisitiri w’Intebe,Dr Nsengiyumva Justin yavuze ko kwita Izina ari umwanya kandi wo gushimira abaturage bose baturiye Pariki z’igihugu, ku ruhare bagira ku kubungabunga ibidukikije.
Yongeyeho ko by’umwihariko ashimira abaturiye pariki y’Ibirunga kuko ari abafatanyabikorwa b’ingenzi mu kubungabunga ibidukikije harimo n’ingagi zaduhurije hano uyu munsi.
Dr Nsengiyumva yavuze ko guverinoma ishishikariza abaturiye iyi pariki kubyaza umusaruro ibikorwaremezo bashyiriweho.
Yagize ati “ Guverinoma irabashishikariza gukomeza kubyaza umusaruro ibikorwaremezo bikikije Pariki ndetse n’imishinga igamije guteza imbere imibereho yanyu.Muhore muzirikana ko izi ngagi ari umutungo w’agaciro kanini dufite kandi tugomba gusigasira twese.”
Yasabye kandi abaturiye Pariki guharanira gukomeza kwakira abashyitsi neza baza gusura ingagi ndetse n’ibice bituriye Pariki.
Yasabye abashyitsi bitabiriye uyu muhango ko nibasubira mu bihugu byabo, baba abahamya b’ibyo u Rwanda rumaze kugeraho no gukora ubuvugizi bujyanye no gukomeza kubungabunga urusobe rw’ibinyabuzima.
