Hatangajwe ibiciro by’amashanyarazi bivuguruye
Urwego Ngenzuramikorere, RURA, rwavuguruye ibiciro by’amashanyarazi, mu rwego rwo kujyanisha ikiguzi cy’amashanyarazi n’ibiyagendaho ndetse no guhaza isoko ry’abayakenera bakomeje kwiyongera.
Ni ibiciro byashyizwe hanze kuri uyu wa Gatatu tariki ya 27 Nzeri 2025 bikaba bizatangira kubahirirwa guhera tariki ya 1 Ukwakira 2025.
RURA ivuga ko icyiciro cya mbere cy’ingo, cyavanywe kuri 15kWh gishyirwa kuri 20kWh, mu rwego rwo gushyigikira ikoreshwa ry’amashanyarazi mu ngo ku rwego rw’ibanze no kugeza amashanyarazi kuri bose.
Muri iki cyiciro cy’abafatabuguzi b’ingo zituwe, izikoresha kWh zitarenze 20, ikiguzi kuri kWh imwe ni amafaranga 89Frw, mu gihe izikoresha 20 kWh kugeza kuri 50 kWh, igiciro kuri kWh imwe ari amafaranga 310Frw naho izirenza 50 kWh kikaba amafaranga 369Frw kuri kWh imwe.
Muri ibi biciro bishya, ibigo byita ku mibereho myiza y’abaturage nk’amashuri n’amavuriro byashyiriweho igiciro cyihariye mu rwego rwo kubyorohereza imikorere, aho ikiguzi kuri kWh imwe ari amafaranga 214Frw.
Amashanyarazi akoreshwa mu nganda yagenewe igiciro cyo hasi
RURA ivuga ko amashanyarazi akoreshwa mu nganda akomeje kugenerwa ibiciro byo hasi, kandi hakaba hari na gahunda ishyiraho agahimbazamusyi ku bantu bakora akazi kabo mu masaha amashanyarazi akoreshwa n’abantu bake (off-peak hours).
Ku nganda nto kWh zose zikoresha, zizajya zishyura amafaranga 175Frw kuri kWh imwe, mu gihe ku nganda ziciriritse kWh zose, igiciro cy’imwe ari amafaranga 133Frw naho ku nganda nini kWh zose, igiciro cy’imwe kikaba amafaranga 110Frw.
RURA ivuga ko iyi gahunda nshya y’ibiciro ishyigikira ishoramari mu bikorwa remezo bibungabunga ibidukikije, harimo na sitasiyo zo kongera amashanyarazi mu binyabiziga biyakoresha (e- mobility), byose bijyanye n’intego z’Igihugu zo guhangana n’imihindagurikire y’ikirere.
Urwego Ngenzuramikorere (RURA) rwavuguruye ibiciro by’amashanyarazi rushingiye ku bubasha ruhabwa n’itegeko N°09/2013 ryo ku wa 01/03/2013 rirushyiraho.
