U Rwanda rwatangije Ikigo Mpuzamahanga cyigisha ibijyanye n’umutekano w’ikoranabuhanga
Iki kigo kizafasha mu gutanga ubumenyi ku banyarwanda ndetse n’abaturuka muri Afurika y’Iburasirazuba, mu byerekeye kubungabunga umutekano mu by’ikoranabuhanga no kubika neza amakuru ibizwi nka ‘Data protection’.
Ni ikigo cyashinzwe ku bufatanye bwa Minisiteri y’Ikoranabuhanga na Inovasiyo, Minisiteri y’Uburezi, Kaminuza y’u Rwanda, na sosiyete ikora ibijyanye n’ikoranabuhanga , CISCO n’Ikigo cy’Ubudage gishinzwe Iterambere mpuzamahanga (GIZ).
CyberHub izajya itanga amahugurwa y’ibanze n’ayisumbuye mu byiciro bitatu by’ingenzi ari byo umutekano w’ikoranabuhanga (cybersecurity), kurengera amakuru n’ibanga ry’umuntu (data protection and privacy), ndetse no guteza imbere imishinga y’ubucuruzi ishingiye ku ikoranabuhanga (entrepreneurship).
Ni ikigo giherereye ku Ishuri Rikuru ry’Ubumenyi n’Ikoranabuhanga rya Kaminuza y’u Rwanda riri mu Mujyi wa Kigali.
Biteganyijwe ko buri mwaka, hazajya hahugurwa abarenga 200, muri bo nibura 30% bakazajya baba ari abagore, bishimangira umuhate wo guteza imbere uburinganire n’ubwuzuzanye mu rwego rw’akazi.
Amahugurwa azibanda cyane ku kwigisha mu buryo bw’imyitozo ngiro kugira ngo abanyeshuri n’abahugurwa babone uburambe bwimbitse mu gukoresha ibikoresho n’ikoranabuhanga rigezweho.
Iki kigo kizaba gifite laboratoire zigezweho, ibyumba by’amahugurwa, hamwe n’ahantu hihariye hazwi nka “salon-café” hahurira abanyeshuri, abahanga mu by’ikoranabuhanga n’abashoramari, bakungurana ibitekerezo n’ubunararibonye mu rwego rwo kuzamura udushya no gukorera hamwe.
CyberHub izashyira imbaraga mu gufasha abanyeshuri gusohoka ku isoko ry’umurimo bafite ubumenyi buhambaye mu by’ikoranabuhanga, ariko kandi inateze imbere iterambere ry’ibigo by’abikorera bato (startups) mu by’umutekano w’ikoranabuhanga no kurengera amakuru.
Iki kigo kizajya gifatanya n’ibigo by’imari, ibigo by’itumanaho n’abandi bafatanyabikorwa mu rwego rwo gutuma amasomo ahabwa abanyeshuri ajyana neza n’ibikenewe ku isoko ry’umurimo.
