Umuhanzi Davido ategerejwe n’abanyaKigali mu gitaramo
Abakunzi b’umuziki w’icyamamare Davido bagiye kongera kugira ibihe byihariye, kuko uyu muhanzi w’umunya-Nigeria uzwi ku ndirimbo zakunzwe hirya no hino, agiye gutaramira i Kigali mu gitaramo kizaba ku itariki ya 5 Ukuboza 2025.
Kuri uyu wa Kane tariki 16 Ukwakira 2025, Skol Malt ku bufatanye na Intore Entertainment bazaganira n’abanyamakuru mu gikorwa cyo gutangaza igitaramo Davido azakorera i Kigali. Iki gikorwa kizabera muri La Noche Kigali, guhera saa kumi n’ebyiri z’umugoroba (6PM) kugeza saa mbiri (8PM).
Ni igikorwa kizatangaza uko abazitabira bazasangira umunezero w’uyu muhanzi mbere y’igitaramo nyir’izina, azahuza no kumurika Album ye ‘5ive’.
Iyi Album ya Davido yabaye iya Gatanu yashyize ku isoko. Yagiye hanze ku itariki ya 18 Mata 2025. Ikubiyemo indirimbo 17, zirimo ubufatanye n’abahanzi b’icyamamare ku rwego mpuzamahanga nka Victoria Monét, Chris Brown, na Omah Lay.
Nk’uko ibitangazamakuru nka Billboard na OkayAfrica byabyanditse, ‘5ive’ ikomatanya amajwi atandukanye, harimo Afrobeats, R&B, n’izindi njyana z’isi yose, bigahesha umuziki we imbaraga nshya kandi ugezweho.
Iyi album igaragaza ko Davido ari umuhanzi ushobora guhuza umuziki gakondo w’Afurika n’amajwi mpuzamahanga, ndetse ikaba ikomeje kugaragaza impano ye yo gukora ibihangano by’icyubahiro ku rwego rw’isi.
Davido uzwiho indirimbo nka “Fall,” “If,” n’izindi nyinshi zakunzwe ku rwego mpuzamahanga, azanye imbaraga nshya mu muziki mu Rwanda, aho ateganya gutuma i Kigali haba ibirori bidasanzwe ku bakunzi be.
Iki gitaramo kizaba kimwe mu byaranze umwaka wa 2025 mu Rwanda, gitewe inkunga na SKOL Malt, ikinyobwa gisanzwe kigezweho ku rubyiniro, imyidagaduro n’ibitaramo bikomeye.
Davido wavutse ku itariki ya 21 Ugushyingo 1992 i Atlanta muri Leta Zunze Ubumwe za Amerika, yatangiye umuziki akiri muto, yihesheje izina rikomeye muri Afurika no ku rwego mpuzamahanga.
Yamenyekanye cyane mu 2011 ubwo yasohoraga indirimbo “Dami Duro”, yamuhesheje ibihembo byinshi birimo na Headies Award. Kuva icyo gihe, yagiye ashyira hanze indirimbo zakunzwe nka “Gobe,” “Fall,” “If,” “FIA” n’izindi, zatumye aba umwe mu bahanzi bakomeye muri Afrobeat.
Mu rugendo rwe, Davido yagiye akorana n’abahanzi bakomeye ku isi nka Chris Brown, Meek Mill, Popcaan, na Summer Walker, ndetse yatsindiye ibihembo bitandukanye birimo BET Awards na MTV Africa Music Awards. Uyu muhanzi yaherukaga i Kigali mu birori bya Trace Awards byabaye mu Ukwakira 2023.
Davido ategerejwe i Kigali, mu gihe aherutse gutangaza ibitaramo muri Nigeria
Mu itangazo yashyize kuri konti ya X, kuri uyu wa Kabiri, uyu muhanzi watsindiye ibihembo byinshi yavuze ko ibitaramo bye muri Nigeria bizatangira mu Ntara ya Uyo, Akwa Ibom, ku itariki ya 26 Ukwakira, agakomereza i Yola, Adamawa ku wa 29 Ukwakira, Enugu ku wa 1 Ugushyingo, akazasoza n’ibitaramo bibiri ku wa 9 Ugushyingo i Ibadan no ku wa 25 Ukuboza i Lagos.
Davido yashimangiye ko gukora ibitaramo mu gihugu cye ari ibintu byihariye kuri we nyuma y’urugendo rwe rwakunzwe cyane muri Amerika ya Ruguru. Yagize ati: “Nishimiye gukorera ibitaramo hirya no hino ku isi, kandi aho njya hose, Nigeria igendana nanjye. Ariko ubu ngiye kuzanira igihugu cyanjye umunezero. Nyuma y’urugendo rutazibagirana muri Amerika ya Ruguru, ni byiza ko tuzazana izo mbaraga aho byose byatangiye.”
Umuhanzi w’icyamamare w’Umunya-Nigeria, Davido agiye gutaramira i Kigali mu gitaramo kizaba tariki ya 5 Ukuboza 2025
Davido wamenyekanye cyane mu ndirimbo zakunzwe nka ‘Dami Duro’, ‘Fall’, ‘If’, n’izindi nyinshi, ni umwe mu bahanzi bakomeye muri Afrobeats ku isi
Davido yaherukaga i Kigali mu 2023, aho yitabiriye ibihembo bya Trace Awards. Ubu, azagaruka mu Rwanda mu gitaramo yahuje no kumurika Album ye ya Gatanu
