Ibiciro ku masoko byiyongereyeho 8 %

Ikigo cy’Igihugu cy’Ibarurishamibare (NISR), cyatangaje ko ibiciro byo mu Rwanda mu kwezi ku Ukuboza 2025, byiyongereyeho 8 %, ugereranyije n’uko byari bihagaze mu kwezi nk’uko mu 2024.

NISR ivuga ko ibiciro mu kwezi ku Ugushyingo 2025 byari byiyongereyeho 7,2% .

Ni imabare yashyizwe hanze kuri uyu wa 10 Mutarama 2026.

Mu kwezi ku Ukuboza 2025, ibiciro byiyongereye bitewe ahanini n’ibiciro by’ibiribwa n’ibinyobwa bidasembuye byiyongereyeho 3,6%, ibiciro by’ibinyobwa bisembuye n’itabi byiyongereyeho 16,7%, ibiciro by’amazu, amazi, amashanyarazi, gazi n’ibindi bicanwa byiyongereyeho 8,4%, ibiciro by’ibijyanye n’ubuvuzi byiyongereyeho 70,8%, ibiciro by’ibijyanye n’ubwikorezi byiyongereyeho 9,4% n’ibiciro by’amafunguro n’icumbi byiyongereyeho 17,4%.

Ugereranyije Ukuboza 2025 n’Ukuboza 2024, ibiciro by’ibintu bitarimo ibiribwa n’ibikomoka ku ngufu byiyongereyeho 8,9%. Ugereranyije Ukuboza 2025 n’Ugushyingo 2025, ibiciro ntibyahindutse.

NISR ivuga ko mu kwezi ku Ukuboza, ibiciro mu byaro byiyongereyeho 3,3% ugereranyije n’Ukuboza 2024.

Ibiciro mu kwezi ku Ugushyingo 2025 byari byiyongereyeho 2%. Bimwe mu byatumye ibiciro byiyongera mu kwezi ku Ukuboza 2025 ni ibiciro by’ibinyobwa bisembuye n’itabi byiyongereyeho 14,4% n’ibiciro by’amafunguro n’icumbi byiyongereyeho 14,6%.

Ugereranyije Ukuboza 2025 n’Ugushyingo 2025, ibiciro byagabanutseho 0,9%. Iri gabanuka ryatewe ahanini n’ibiciro by’ibiribwa n’ibinyobwa bidasembuye byagabanutseho 1,7%. biciro bikomatanyirijwe hamwe mu mijyi no mu byaro mu Ukuboza 2025, byiyongereyeho 5,2% ugereranyije n’Ukuboza 2024.

Mu kwezi ku Ugushyingo 2025 ibiciro byari byiyongereyeho 4,1%. Bimwe mu byatumye ibiciro byiyongera mu kwezi kw’Ukuboza 2025 ni ibiciro by’ibiribwa n’ibinyobwa bidasembuye byiyongereyeho 1%, ibiciro by’ibinyobwa bisembuye n’itabi byiyongereyeho 15,1%, ibiciro by’amazu, amazi, amashanyarazi, gazi n’ibindi bicanwa byiyongereyeho 4,9%.

Ibiciro by’ibijyanye n’ubuvuzi byiyongereyeho 63,6%, ibiciro by’ibijyanye n’ubwikorezi byiyongereyeho 7,8% by’amafunguro n’icumbi byiyongereyeho 16,2%.

Ugereranyije Ukuboza 2025 n’Ugushyingo k’uwo mwaka, ibiciro byagabanutseho 0,6%. Iri gabanuka ryatewe
ahanini n’ibiciro by’ibiribwa n’ibinyobwa bidasembuye byagabanutseho 1,4%.