Akarengane n’akavuyo bivugwa muri Komisiyo y’Imyinjirize ya Rayon Sports Abakozi birukanwa, abinjira bidasobanutse, abafana barijujuta!
Nyuma y’uko komite nyobozi nshya ya Rayon Sports iyobowe na Twagirayezu Thadée ijyaho, hashyizweho n’inzego nshya zirimo n’ishinzwe umutekano ku kibuga, rizwi nka Komisiyo y’Imyinjirize, riyoborwa na Kamayirese Jean d’Amour.
Amakuru agera kuri Impuruza.net yemeza ko kuva iyi komisiyo yashyirwaho, hajemo akavuyo karangwa no guhindagura abakozi, ibintu byavuyemo impaka hagati y’abayobozi n’abakoraga muri iyo serivisi.
Bivugwa ko Kamayirese yirukanye bamwe mu bakozi bari basanzwe bakora imirimo y’imyinjirize, barimo Rusanganwa Isaac (Dudu), wari ushinzwe umuryango w’abanyamakuru, ndetse na Hakizimana, wari ushinzwe umuryango ujya ku rwambariro rw’abakinnyi.
Ubwo Rayon Sports yakiraga Amagaju FC kuri Pelé Stadium i Nyamirambo, bamwe mu batari abanyamakuru binjiriye mu muryango wagenewe abanyamakuru bishyuye amafaranga 1,000 Frw, mu gihe itike isanzwe yari 3,000 Frw. Ibi byakuruye ibibazo n’impaka hagati y’abakozi n’abafana.
Bamwe mu bakobwa bakora muri protocole imbere muri stade batifuje ko imyirondoro yabo itangazwa, bavuze ko ibintu muri Rayon Sports byabaye akajagari.
“Ibyo muri Rayon Sports byabaye agatereranzambe. Uyu munsi ukora, ejo ntukigaragare. Kamayirese iyo yaguhamagaye ntusubize, ahita agusimbuza undi akagutuka,” umwe muri bo yabwiye Impuruza.net.
Undi yongeyeho ati:
“Ku gihe cya Perezida Uwayezu Ltd twabaga tuziko dufite imirimo n’aho dukorera hazwi, ariko ubu ni akavuyo gusa!”
Ku byerekeye ibihuha by’inkundo bivugwa hagati y’abakozi b’iyi komisiyo, umwe mu bakobwa twaganiriye nawe, twamwise Mukeshimana ku mpamvu z’umutekano, yagize ati:
“Ibyo bihuha by’inkundo ni ibisanzwe. Abantu ni bakuru, bazi kwifatira imyanzuro. Kandi si muri Rayon Sports gusa, no mu yandi makipe birabaho.”
Gusa bamwe mu bafana bavuga ko ibyo bishobora kwangiza imikorere n’isura y’ikipe, cyane cyane mu gihe bikomeza gufata intera mu mikorere isanzwe, akaba ari naho bahera basaba ko ibi bintu byakurikiranwa byaba ngombwa ubuyobozi bukeguzwa.
Twagerageje kuvugisha Kamayirese Jean d’Amour, umuyobozi wa komisiyo y’imyinjirize ya Rayon Sports, kugira ngo agire icyo avuga kuri ibi birego. Ariko kugeza ubwo twandikaga iyi nkuru, ntiyigeze agira icyo atangaza.
Impuruza.net izakomeza gukurikirana iki kibazo kugira ngo haboneke ukuri ku byo abakozi n’abafana bavuga, kandi izakomeza gutangaza amakuru yizewe avuye impande zombi, cyane cyane nk’uko amategeko y’itangazamakuru abiteganya impande zombi ziba zigomba guhabwa ijambo.
