Ally Yusuf Mugenzi mu bashinjwa gukwirakwiza ingengabitekerezo ya Jenoside binyuze mu itangazamakuru

Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, yagaragaje uburyo uwahoze ari umunyamakuru wa BBC, Ally Yusuf Mugenzi, yagize uruhare mu gukwirakwiza imvugo z’uko mu Rwanda habaye Jenoside ebyiri, mu rwego rwo gukingira ikibaba abateguye bakanashyira mu bikorwa Jenoside yakorewe Abatutsi.

Ibi yabigarutseho kuri uyu wa Gatandatu tariki ya 11 Mata 2026, mu kiganiro kigaruka ku mateka yagejeje ku bitabiriye igikorwa cyo kwibuka ku nshuro ya 32 Jenoside yakorewe Abatutsi i Kiziguro mu Karere ka Gatsibo.

Minisitiri Bizimana yagarutse kuri bamwe mu bayobozi n’abo mu nzego z’umutekano bavukaga mu yahoze ari Perefegitire ya Byumba bagize uruhare muri Jenoside yakorewe Abatutsi. Aza no kugaruka ku ruhare rw’umunyamakuru Ally Yusuf Mugenzi nawe uvuka i Ndatemwa muri aka gace.

Minisitiri Bizimana yavuze ko Ally Yusuf Mugenzi yakoranye bya hafi na Colonel Juvenal Bahufite wari warashinzwe ubutasi mu ngabo zatsinzwe, maze mu 1996 bumvikana n’uyu munyamakuru uburyo bagomba kuzakoresha itangazamakuru bakamenyekanisha gahunda yabo no kugoreka amateka, guhakana no gupfobya Jenoside yakorewe Abatutsi.

Ati “Bemeranyije ko bazahakana Jenoside yakorewe Abatutsi bakajya bavuga ko n’Abahutu bishwe, ko habayeho Jenoside ebyiri. Bemeranywa kandi ko hagomba gukorwa ibishoboka byose icyaha cya Jenoside kigakurwa ku Bahutu, ngo be kuzanakurikiranwa n’Urukiko Mpuzamahanga rwa Arusha rwari rumaze gushingwa.’’

Minisitiri Bizimana yavuze ko Colonel Bahufite yemeranyije na Ally Yusuf Mugenzi ko mu biganiro bya BBC Gahuzamiryango bazajya bakoresha ayo mayeri, bagaha ijambo abakoze Jenoside n’abayipfobya kugira ngo ubukana bwayo bwe kuvugwa.

Ati “Ngibyo ibikorwa byose Mugenzi yayoboye, ibiganiro byose yayoboye mu Imvo n’Imvano n’akarimi keza, yari ari muri gahunda bemeranyijweho hagati ye na Colonel Bahufite, uwahoze ari Minisitiri w’Ingabo Bizimungu n’irindi tsinda ry’abasirikare bakuru.’’

Minisitiri Bizimana yavuze ko kuri ubu Mugenzi asigaye yerura akavuga ko Jenoside yakorewe Abatutsi atayemera ndetse n’iyo myaka yose yamaze kuri BBC atayemeraga.

Ati “Benewabo bose babimenye bitandukanyije na Mugenzi kuko araroga. Ntabwo tugishaka abantu baroga Abanyarwanda, Oya! Turashaka abigisha beza, u Rwanda rukomeze rube igihugu cyacu twese.’’

Minisitiri Bizimana yavuze ko umukobwa wa Colonel Bahufite witwa Bahufite Liliane ari we usigaranye imyumvire ya se, aho ari mu bashinze umuryango Jambo ASBL [ihuriro rigizwe n’abana bakomoka ku bagize uruhare muri Jenoside yakorewe Abatutsi mu 1994], aho yiyemeje gukomeza uwo murage wa se wo gusebya u Rwanda ahantu hose no gukwirakwiza ingengabitekerezo ya Jenoside.

Inama y’abasirikare bakuru basabye imikoranire na Ally Yusuf Mugenzi ngo yari iyobowe na Gen Augustin Bizimungu wabaga i Goma, Gen Gratien Kabirigi wabaga i Bukavu, Col Aloys, Col Renzaho Tharcisse, Col Murasampongo Joseph, Lt Col Ndahimana Jean Marie Vianney, Lt Col Nsengiyumva Anathole, Lt Col Sebahire Antoine na Lt Col Rwamanywa Augustin.

Ally Yusuf Mugenzi yabaye umunyamakuru wa BBC imyaka irenga 27, aho yumvikanaga mu ishami ry’Ikirundi n’Ikinyarwanda mu makuru ndetse n’ibiganiro bitandukanye birimo Imvo n’Imvano cyasesenguraga amakuru ya politi yo mu Karere.

Mu 2023 nibwo yanditse ku mbuga nkoranyambaga ko asezeye kuri iyi radiyo yakoreye imyaka myinshi.