Kigali: Abashoramarikazi baturutse muri Ile Maurice baje mu butumwa bugamije guteza imbere ubucuruzi hagati y’ibihugu bya Afrika

Abagore b’abashoramari bo muri Ile Maurice n’abo mu Rwanda batangaje ko bagiye gushimangira ubufatanye mu bucuruzi n’ishoramari, binyuze mu mikoranire hagati y’ibigo byabo hagamijwe kwagura amasoko no guteza imbere ubukungu bw’ibihugu byombi.

Ni ibyatangajwe kuri uyu wa Mbere tariki 18 Gicurasi 2026, mu muhango wo gutangiza ku mugaragaro gahunda yiswe SheTrades Hub-to-Hub Collaboration Mission, iri kubera i Kigali kuva tariki 18 kugeza ku ya 20 Gicurasi 2026.

Iki gikorwa cyateguwe na SheTrades Mauritius Hub ikorera mu Kigo cy’Iterambere ry’Ubukungu muri Mauritius (EDB Mauritius), ku bufatanye na SheTrades Rwanda Hub ikorera mu Rugaga rw’Abikorera mu Rwanda (PSF), kikaba kigamije guteza imbere ubufatanye hagati y’abagore ba rwiyemezamirimo bo muri Afurika binyuze mu Isoko Rusange rya Afurika (AfCFTA).

Uru ruzinduko rw’iminsi itatu rwitabiriwe n’abagore b’abashoramari bagera kuri 18 baturutse muri Mauritius, bakorera mu nzego zirimo inganda, ikoranabuhanga, ubuzima, ubukerarugendo, imyenda, ubukorikori, ubwiza n’amavuta yo kwisiga, uburezi ndetse n’ibikomoka ku buhinzi.

Abitabiriye iki gikorwa bagiranye ibiganiro byibanze biganisha ku gushaka amahirwe y’ubucuruzi, kubaka imikoranire hagati y’ibigo byo mu Rwanda n’ibyo muri Ile Maurice, ndetse no gushora imari mu mishinga y’abagore b’Abanyarwandakazi.

INEZA Marianne ni umwe muri ba Rwiyemezamirimo bitabiriye iyi nama, ibyo akora bishingiye ahanini k’uburezi, akavuga ko yishimiye guhura na bagenzi be kuko hari ibyo azabigiraho byinshi cyane cyane uburezi bushingiye ku ikoranabuhanga .

Yagize ati: “ Nk’ubu nabonanye na ba Rwiyemezamirimo 4 nabo bakora nk’ibyanjye kandi nifuzaga; hazabaho rero guhura menye uko iwabo babikora nanjye nzamenye ibyo nabigiraho byafasha Igihugu cyacu”.

Umuyobozi wa Healthcare and Life Sciences akaba anayobora SheTrades Mauritius Hub, Nirmala Jeetah, yavuze ko uru ruzinduko rugamije gufasha abagore ba Rwiyemezamirimo kwagura ibikorwa byabo bakarenza amasoko basanzwe bakoreramo.

Yagize ati: “U Rwanda rufite amahirwe akomeye mu bijyanye n’udushya, ishoramari n’ubucuruzi. Turashaka gufasha abagore b’abashoramari bo muri Mauritius kubaka ubufatanye burambye n’abo mu Rwanda ndetse no gukorera ku isoko rya Afurika muri rusange.”

Na ho Umuyobozi wa PSF Specialized Cluster, Thérèse Sekamana, yavuze ko abagore b’abashoramari bo muri Mauritius bataje gufungura ibikorwa byabo bonyine mu Rwanda, ahubwo bazakorana n’abagore bafite ibigo by’ubucuruzi mu Rwanda.

Ati: “Intego ni uko buri kompanyi yo muri Mauritius izakorana n’iyo mu Rwanda kugira ngo habeho ubufatanye bufitiye inyungu impande zombi. Turateganya no gusinyana amasezerano y’ubufatanye (MoU) agamije gutuma iyi mikoranire iramba.”

Ikibazo cy’ururimi gishobora kwibazwaho na ba Rwiyemezamirimo b’Abanyarwanda cyane cyane mu bacirirtse bakeka ko cyaba imwe mu nzitizi n’impamvu yo kudahuza mu mikoranire yabo…

Sekamana abamara impungenge yagize ati: “ Dufite abasemuzi badufasha guhuza ibiganiro, ikindi navuga ko iterambere ryaje kuko nka njye mvuye mu Bushinwa ndiyo nakoreshaga igishinwa nifashishije ikoranabuhanga; hari uburyo bwinshi bwifashishwa ikibazo cy’ururimi cyarakemutse”.

Sekamana yanashishikarije abagore b’Abanyarwandakazi gutinyuka bakinjira no mu mishinga minini isanzwe ifatwa nk’iyiganjemo abagabo, agaragaza ko abagore bafite ubushobozi bwo gutsinda no mu nzego zirimo ingufu, ubwubatsi n’ubucukuzi bw’amabuye y’agaciro.

Abategura iki gikorwa bavuga ko u Rwanda rwatoranyijwe kubera uburyo rworohereza ishoramari, ubukungu bukomeje kuzamuka ndetse n’uruhare rukomeye rushyira mu guteza imbere abagore mu bukungu.

Muri gahunda y’iri huriro harimo ibiganiro by’abashoramari, amahugurwa agamije kubaka ubushobozi, guhuza ibigo by’ubucuruzi (B2B matchmaking), imurikabikorwa ndetse no gusura ibigo bitandukanye bikorera mu Rwanda.

SheTrades Rwanda Hub yatangijwe mu 2021 ku bufatanye bwa Minisiteri y’Ubucuruzi n’Inganda (MINICOM), Ikigo Mpuzamahanga cy’Ubucuruzi (ITC) ndetse na PSF, hagamijwe gufasha abagore ba rwiyemezamirimo kwitegura kohereza ibicuruzwa hanze no kubahuza n’amahirwe y’ishoramari.

SheTrades Mauritius Hub yo yatangiye mu 2023, ikaba ifasha abagore ba rwiyemezamirimo kugera ku masoko mpuzamahanga, kubona amahugurwa ajyanye n’ubucuruzi bw’ikoranabuhanga ndetse no kubona uburyo bwo kugera ku nkunga n’inguzanyo.